“Zəfər paradı” adlı möhtəşəm tədbir

BalaBilgə Uşaq Bağçası Gənclik filialında “Zəfər paradı” adlı möhtəşəm tədbir keçirdi. Bu tədbir vətənimizin azadlığı və ərazi bütövlüyü uğrunda canını fəda etmiş qəhrəmanlarımızın əziz xatirəsini yad etməklə yanaşı, gələcək nəsillərə vətən sevgisi aşılamaq məqsədini daşıyırdı.

 Tədbirə BalaBilgə Uşaq Bağçasının balaca qəhrəmanları xüsusi hərbi formalar geyinərək qatıldılar. Uşaqların ifasında vətənə həsr edilmiş şeirlər və mahnılar səsləndirildi. Hər kəs Azərbaycan bayrağını qürurla dalğalandırdı, balaca vətənpərvərlər milli rəqslər ifa edərək tədbirə xüsusi rəng qatdılar. Tədbir boyunca uşaqlar vətənpərvərlik ruhunda böyümək, qəhrəmanlarımızın şərəfli tarixini unutmamaq və onu yaşatmaq üçün böyük coşqu nümayiş etdirdilər.

Tədbirin əsas hissəsi BalaBilgə Uşaq Bağçasında təhsil alan şəhidimiz Fuad Bağırovun oğlu Hüseynin səhnəyə çıxışı oldu. Hüseynin çıxışı zamanı iştirakçılar arasında duyğusal anlar yaşandı. Tədbirin sonunda BalaBilgə Uşaq Bağçasının direktoru Ülviyyə Həsənova Hüseyni qucağına alaraq şəhidimiz Fuad Bağırovun xatirəsini böyük hörmətlə yad etdi.
 
Tədbirin keçirildiyi məkan xüsusi olaraq bəzədilmişdi. Şəhidlərimizin şəkilləri, Azərbaycanın üçrəngli bayrağı və Zəfər bayramını əks etdirən simvollar tədbirin ruhunu daha da yüksəldirdi. 

Bu möhtəşəm tədbir bir daha göstərdi ki, qəhrəmanlarımızın şərəfli mübarizəsi və qələbəsi daim ürəklərdə yaşayacaq. Gələcəyimiz olan uşaqlar bu bayramla bir daha vətənə olan sevgi və hörmətlərini ifadə etdilər.