Hədəf STEAM Liseyinə qəbul qaydaları

Hədəf STEAM Liseyinin 2025/2026-cı tədris ili üçün qəbul-güzəşt qaydaları

Hədəf STEAM Liseyində 2025/2026-cı tədris ilində təhsil almaq istəyənlər üçün 14 aprel tarixində qəbul-güzəşt imtahanı keçiriləcək. İmtahan 4 – 10-cu siniflərdə oxuyan (5 – 11-ci siniflərə qəbul olmaq istəyən) şagirdlər üçün Azərbaycan və rus bölmələri üzrə nəzərdə tutulur.

Qəbul-güzəşt imtahanı Hədəf STEAM Liseyinə qəbul qaydasının əsas prinsipidir və hər il keçirilir. Güzəşt imtahanı keçirməkdə hədəfimiz şagirdlərin bilgi və mühakimə bacarıqlarını ölçmək, xüsusi istedadlı şagirdləri müəyyənləşdirmək və imtahan nəticələrinə görə onlara güzəştli təhsil imkanı yaratmaqdır. Hədəf STEAM Liseyi milli və bəşəri dəyərlərə önəm verən milli təhsil brendidir. Buna görə də istedadlı şagirdlərə dəstək olmaq, onların gələcəyinə yaxşı mənada təsir etmək məqsədilə şagirdlərin təhsil xərclərini tam və ya qismən qarşılamağı öz üzərimizə götürməyə qərar verdik. Düşünürük ki, istedadlı, amma maddi imkanı olmayan şagirdlər də bu şansdan yararlanaraq özəl liseydə təhsil alıb ölkəmizin və dünyamızın gələcəyinə faydalı şəxsiyyət kimi yetişməlidirlər.

Təhsil güzəştindən yararlanmaq üçün şagirdlər müəyyən imtahandan keçməlidirlər.

İmtahan nəticəsinə əsasən onlarla şagird 100 %, yüzlərlə şagird isə 20 % – 70 % güzəştlə təhsil şansı qazanacaqlar.

QEYD: Hadaf Cambridge International School üçün qəbul məktəbəqədər və 1 – 7-ci siniflər üzrə aparılır. İngilis bölməsinə güzəştli təhsil (istedad güzəşti istisna olmaqla) nəzərdə tutulmayıb!

I və II siniflərə qəbul müsahibə yolu ilə həyata keçirilir. Müsahibə hər şagird üçün 25 – 30 dəqiqə müddətində davam edir. Müsahibə şagirdin məntiqi mühakimə qabiliyyətini, əl motorikasını, dünyagörüşünü, psixoloji durumunu, özünüifadə qabiliyyətini, yaş səviyyəsinə uyğun bilik bazasını ölçən sualları əhatə edir.

Qəbul-güzəşt imtahanı 3 fənn üzrə keçirilir:

 IV sinif üçün:

Tədris dili (Azərbaycan və rus dilləri) 20 sual;

Riyaziyyat 20 sual;

İngilis dili 20 sual.

V – X siniflər üçün:

Tədris dili (Azərbaycan və rus dilləri) 30 sual;

Riyaziyyat 30 sual;

İngilis dili 30 sual.

IV – VII siniflər üzrə suallar şagirdin təhsil aldığı tədris ili mövzularını 60 %, öncəki illərin mövzularını 40 % əhatə edir. VIII – X siniflər üçün imtahan mövzuları DİM-in buraxılış imtahanı proqramları əsasında müəyyən edilir.

İmtahan müddəti IV sinif üçün 120 dəqiqə, V – X siniflər üçün 180 dəqiqə nəzərdə tutulur.

Qəbul-güzəşt imtahanının nəticəsinə əsasən:

1. a) 91 % – 100 % nəticə göstərən balabilgələr – 100 % güzəşt;
2. b) 81 % – 90 % nəticə göstərən balabilgələr – 70 % güzəşt;
3. c) 71 % – 80 % nəticə göstərən balabilgələr – 50 % güzəşt;
4. d) 51 % – 70 % nəticə göstərən balabilgələr – 20 % güzəşt qazanırlar.

Güzəştlərlə bağlı əlavə qeydlər

1. Bütün güzəştlər sadəcə təhsil haqqına şamil edilir, digər xidmətlərə aid edilmir. Tədris ili ərzində istifadə edilən digər xidmətlər: tədris resursları, uniforma, vəsaitlər, proqram təminatı, tədris prosesinə aid nəqliyyat, sınaq imtahanları, yemək və s. ümumilikdə, 1500 manat təşkil edir.
2. Güzəştlər heç bir halda toplanılmır, ən böyük güzəşt nəzərə alınır. Bütün güzəştlər elmi-pedaqoji şuranın təyin etdiyi əsas məbləğlər üzərindən hesablanılır.
3. 50 % – 100 % güzəşt əldə etmiş şagirdlərin ödənişləri hissələrə bölünmür, birdəfəlik ödənilir və bu zaman birdəfəlik ödəniş güzəştindən istifadə edilmir.
4. Hazırda Hədəf STEAM Liseyində təhsil alan şagirdlərin də güzəşt imtahanında iştirak etmə hüququ var və bu zaman onlarla kənar şagirdlər arasında heç bir fərq nəzərdə tutulmur.
5. Bütün güzəştlər 2025/2026-cı tədris ilinin təsdiq edilmiş əsas təhsil ödənişi məbləği üzərindən aparılır.
6. Güzəşt imtahanında qazanılan güzəşt bir il üçün keçərlidir və hər il keçirilən güzəşt imtahanında əldə edilən bilik nəticəsinə görə təyin edilir.
7. Qazanılan güzəşt 1 iyun tarixinə qədər qüvvədədir. Bu müddət ərzində müqavilə bağlanılmasa, güzəşt ləğv edilir.
8. İmtahana giriş kuponunu Hədəf STEAM Liseyinin hər iki filialından və Hədəf Kurslarının bütün filiallarından əldə edə bilərsiniz.
9. Güzəşt imtahanına qeydiyyat 30 yanvar – 10 aprel tarixlərində davam edəcək.
10. Güzəşt imtahanına giriş kuponunun qiyməti 15 AZN-dır.